Thursday, March 8, 2012

Shikwa ........................

Kya karu shikayat, Shikwa kya karu!
Tujhse mai haal-e-dil bayan kya karu!!
      Tune jo dard diya hai mujhe,
      Is zakhmi dil ki peeda kya kahu,
      Tune jo thana hai, mujhe hi mitana hai,
      Apne zidd ke aagey tujhe duniya jhukana hai,
      Kabhi mai hi teri subah thi, mai hi din-raat,
      Mai hi teri khushi thi, mai hi teri hansi,
      Ab in khamosh hue hothon ki jubaa kya kahu,
Kya karu shikayat, Shikwa kya karu!
      Vaada tha tera sari khushiyan mujhe doge,
      Do pag mai sath chalu, tum manzil tai kar loge,
      Beech raah mei chhor gaye tum, roti mujhe akeli,
      Ab in behte hue aansuon ki peeda kya kahu,
Kya karu shikayat, Shikwa kya karu!
      Jamane ki parwah na karoge, aisa kaha tha tumne,
      Vaada karte the ki, kabhi zuda na hoge,
      Bekaraar dil tha tumhara mere liye,
      Is bechain dil ki tadap tujhse kya kahu,
Kya karu shikayat, Shikwa kya karu!
Tujhse mai haal-e-dil bayan kya karu!!

Wednesday, March 7, 2012

Ek Kiran ............

Ek roshni ki kiran chupke se
    Meri zindagi mei aayi,
Mujhe maloom hai yeh meri nahi
    Phir bhi mai ise apnai,
Is kiran ki aas mei
  Na jane kabse mai baithi rahi
Aaj apni hokar bhi lagti hai parai.


Is chhoti si zindagi mei
    Itni hai gehrai,
Ki sath chhor deti hai
    Apni hi parchhai,
Yeh kiran na jane kab
    Sath chhor chali jaye,
Aur chha jaye charo ore
    Phir wohi tanhai,
Aye kiran khuda ke liye
    Tum na hona parai,
Warna hogi meri hi
    Is jahan mei jag hansai.

Monday, February 27, 2012

Phir Tum Yaad Aaye ................

Aaj phir tum yaad aaye,
Phir teri baatein mujhe sataye,
Kabhi rulaye, kabhi hansaye!
Tera yeh kehna mujhe chhor ke jana,
Aur phir mujhe samjhana,
Phir yeh kehna mujhe chhor na jana,
Oh janejana phir tum yaad aaye!
Teri baatein phir mujhe hansaye!!
      Jo haseen lamhe hamne sath bitaye,
      Woh haseen pal dil mei samaye,
      Mera hath tham tera muskana,
      Aur mera dheere se sharmana,
      Phir yeh kehna Tu meri ho jana,
Oh janejana phir tum yaad aaye!
Teri baatein phir mujhe hansaye!!
      Woh meri shararat jo tujhe tadpaye,
      Aur tera chup rehna mujhe sataye,
      Mere kuchh puchhne par tera yeh kehna,
      Tu meri zindagi meri din raina,
      Bas sang mere chalti rehna,
Oh janejana phir tum yaad aaye!
Teri baatein phir mujhe hansaye!!
      Teri aankhon ki gehrai bechain kar jaye,
      Har pal tere kareeb laye,
      Woh sindur rupi zindagi dena,
      Yun pyaar ka izhaar karna,
      Woh meethe meethe sapne sajana,
Oh janejana tum kyun yaad aaye,
Kyun teri baatein mujhe sataye,
Kabhi hansaye kabhi rulaye,
Aaj phir tum bahut yaad aaye!!

Muddat Ke Baad ...........

Bade muddat ke baad, Dil kiya kuchh likhne ko,
Na jane kyun aaj, Dhadkan ne kaha kuchh kehne ko,
Parantu!! Na jane tum kuchh sun paoge!
Mere dil ki aah samajh paoge!!


In kale badalon ke sahare,
Kehna hai mujhe tumse kuchh!
In lal sinduri ghataon ke sang,
Batana hai tumse kuchh!
Par kash tum mere paas hote,
Kash mai khud tumhe bata sakti,
Aur apne paas tumhe baitha,
Apne dil ki dastaan suna pati!
Kash ki tum hote, Mai hoti aur,
Yeh lal sinduri ghatayein hote,
Aur in dhalte sham ke sang,
Hum is dunia se bekhabar,
Kho jate bas ek duje sang,
Aur ek duje ka hath thame,
Pariyon ki dunia mei chale jate,
Jahan sirf pyar hi pyar hota,
Mai hoti, Tum hote aur yeh,
Hamare sapne sach hote,
Hum is jahan ke pyar mei kho jate!


        Ha ..... Kehna toh hai aur bhi kuchh,
        Kyunki barso baad aaj,
        Mere dil ne ek sapna dekha,
        Na jane kyun aaj kaha,
        Tumse kuchh kehne ko, kuchh batane ko,
        Bade muddat ke baad Dil kiya kuchh likhne ko!!!

Tuesday, February 14, 2012

Jawaab.....??

Shaant, Har koi shaant,
Charon ore khamoshi, Har koi hai khamosh,
Yeh raat, Yeh pal, Aur meri zindagi,
Aur isme mera ek sawaal,
Koi de sakta hai iska jawaab?
Aakhir kyu, Yeh chand, Yeh raat,
Aur yeh pyare chamkile taare,
Aaj itne shaant kyu hain,
In khamoshi ke beech ek mera man hi toh hai,
jo shaant nahi bechain hai,
Kya mai janti hun iska jawaab?
Shayad nahi, Mai nahi janti,
Mai padesan hun apne aap se,
Ulajh gayi hun apne uljhano mei,
Kya koi nahi aayega,
Mujhe batane, Mera jawaab dene,
Koi toh hoga jo janta ho,
Par kaun hai kahan hai?
Uff!!! Phir ek sawaal,
Sirf sawaal hi toh hai mere paas,
Aur jawaan na jane kahan hai,
Aur jane kab milega,
Milega bhi ya nahi, Koi nahi janta,
Na jane kab tak mera mann,
In uljhano mei uljha rahega,
Aur yeh khamosh pal mujhe chidhata rahega,
Na jane kab milega mujhe mera jawaab??

Monday, February 13, 2012

Tanhai...........

Kal jab mai udaas baithi thi,
Na jane kiski aahat si hui,
Ek alag sa ehsaas hua,
Mai chaunk kar pichhe mudi,
Par yeh kya... Yaha toh koi nahi hai,
Mai ghabra gayi, saham gayi,
Aur idhar udhar dekhne lagi,
Tabhi mere ander se ek awaj aayi,
Tu kise dhoondh rahi hai,
Kiski raah tak rahi hai,
Kiske intezaar mei udaas baithi hai,
Jo ki tera hai hi nahi,
Jab saya tera na hua,
Toh parayon ka itezaar kyu,
Kyu kisi ke intezaar mei aansu tham nahi rahe,
Tabhi maine apne mann ko samjhaya,
Nahi aur koi na sahi,
Yeh sham aur iski tanhai toh meri hai,
Yeh akeli udaas shaam toh apni hai,
Mai isi mei apni khushi dhoondhungi,
Mai toh bas iski hi raah takungi,
Jab bhi mera man udaas hoga,
Mai shaam se milungi,
Aur is tanha shaam ke sath,
Apni tanhai baatungi,
Aur koi na sahi yeh shaam toh meri hai,
Mai iske hi sahare reh lungi,
Yeh shaam toh mere pyare waqt ka sabut hai,
Isne toh woh sare pal dekhen hai,
Use mehsoos kiya hai,
Phir mai kyu na ise apna kahun,
Yehi toh hai jisne ab tak,
Sath diya hai mera,
Yehi toh hai bas meri apni,
Meri shaam pyari shaam.......

Tuesday, January 31, 2012

Yaadein.........

Jab yaad kisi ki aati hai,
Toh kyun kavita ban jati hai,
Kavita mei kuch dard chhupa,
Bas tera ek gam chhupa,
Yaad me mere, khayal me mere,
Nas-nas me aur jaan me mere,
Tumhi ek armaan ho mere,
Armaan se aur yaad se puchho,
Kyun isko yaad satati hai.
         Jab yaad kisi ki aati hai,
         Kyun aansu ban beh jati hai,
         Puchho behte aansu se,
         Ise kiski yaad satati hai,
         Aansu me mere arzoo me mere,
         Dil ki har dhadkan me mere,
         Tumhi har ek saans ho mere,
         Dhadkan se aur saans se puchho,
         Ek teri yaad satati hai!!!!

Kaise Keh Du ......

Puchha karte hai sub mujhse, kya pyar me roi nahi 
kaise kah du subko, mai pyar me khoi nahi
sonch sonch kar din katata hai 
nind ankho me ab ati nahi
har pal hai intazar tera hi 
tum bin kaun hai, koi nahi
sub kahte hai pagli, jhuti 
 tere hi gum me khoi rahi
har ahat pe dhundhoo tujhko
har kadam pe chaunki hu
har sanse hain teri sanse
aur dharkan me koi nahi
har sapno me dekhun tujhko
teri yaad me roti rahi
phir kah du kaise mai subse
ki mai pyar me roi nahi.....

Thursday, January 26, 2012

Tujhe Mai Kya Kahun......

Mehboob Mere Tujhe Mai Kya Kahun,
Wafa Kahun Ya Majboor Beta, Tu Hi Bata De Tujhe Kya Kahun,
Tujhe Pyar Kahun Ya Bebas Insaan,
Tu Bewafa Bhi Nahi Hai, Par Sachha Humsafar Bhi Toh Nahi,
Aye Mere Humdum Kya Tujhe Thoonth Kahun,
Ya Aye Mere Sanam Tujhe Mai Jhooth Kahun,
Kahi Tu Gehra Sagar Toh Nahi, Jo Sirf Apne Bheetar Ke Jeev Ko Palta Hai,
Aur Hamare Liye Kabhi Khara Toh Kabhi Namkeen Hai,
Ya Phir Tujhe Woh Chuja Kahun, Jise Sirf Neerr Hi Bhata Hai,
Ya Suraj Ke Aanchal Mei Chhupa Surajmukhi Kahun,
Aye Mere Mehboob Tu Hi Bata, Tujhe Mai Kahun Toh Kya Kahun.

Kehte Hai Woh......

Kehte Hai Woh Pyar Hai Itna,
Sagar Mei Hai Pani Jitna,
Sagar Ka Pani Sukh Gaya Kya,
Pyar Yeh Tera Ruth Gaya Kya,
Sagar Mei Hai Ab Bhi Pani,
Phir Kyu Rutha Pyar Yeh Tera,
Kyu Chhuta Hai Sath Yeh Tera,
Sagar Nahi Ek Boond Hi De Do,
Mera Sara Jeevan Le Lo.